Ancares Cycling Marathon 2025: UN ÉXITO!
O pasado 10 de agosto, a Ancares Cycling Marathon puxo a proba a centos de ciclistas nas montañas lucenses. Parabéns a todos os participantes por superar o desafío!
Esta edición marcou un fito histórico para a proba: contamos con case 550 participantes, o que supuxo un incremento de preto do 30% na participación respecto a anos anteriores.
Ademáis, grazas ao esforzo da organización e á deportividade dos ciclistas, a xornada desenvolveuse sen apenas incidentes, garantindo unha experiencia segura e memorable.
Dende o Clube Ciclista Cidade de Lugo, convidámoste a descubrir ou redescubrir Os Ancares sobre as dúas rodas. Se che gusta o ciclismo, non podes faltar. En 2026, Os Ancares agárdante.
A chaira de Castro de Rei acolleu o mellor CRI do ano en Galicia
O sábado 1 de xuño, a comarca da Terra Chá converteuse no epicentro do ciclismo galego coa celebración do Campionato de Galicia de Contra o Reloxo Individual (CRI) 2025, organizado polo noso Clube Ciclista Cidade de Lugo en colaboración coa Federación Galega de Ciclismo (FCG).
Máis de 220 ciclistas puxeron a proba a súa forza e resistencia nas longas rectas da chaira lucense, nun percorrido técnico e rápido con saída e chegada en Castro de Ribeiras de Lea, no concello de Castro de Rei.
O campionato repartiu un total de 20 títulos autonómicos, entre categorías absolutas, base e paraciclismo, demostrando o alto nivel e a diversidade do ciclismo galego. O mellor tempo da xornada asinouno o coruñés Damián Ramos, que percorreu os 19,7 km do circuíto longo en 25:23 minutos, a unha media de 46,5 km/h. Na categoría feminina, a elite Tamara Seijas, do RG Bikes Scott Team, logrou o título cun rexistro de 28:33 minutos, estreándose como campioa galega de CRI. Parabéns para ambos!
A cerimonia de entrega de premios contou coa presenza de representantes institucionais como Francisco Javier Balado, alcalde de Castro de Rei, e Juan Carlos Muñiz, presidente da FCG, entre outras múltiples persoalidades.
Desde o Clube Ciclista Cidade de Lugo queremos agradecer profundamente a colaboración das administracións locais, voluntariado, patrocinadores e, por suposto, a todos os clubs e ciclistas participantes. Un placer traballar deste xeito!
