No Clube Ciclista Cidade de Lugo levamos máis de dúas décadas pedaleando con ilusión, compañeirismo e paixón polo ciclismo. Fundado no ano 2000, o clube naceu co obxectivo de compartir o amor pola bicicleta de estrada, e ao longo dos anos fomos medrando como grupo e como familia.
O que comezou como un pequeno grupo de afeccionados converteuse nun punto de encontro para persoas de todas as idades que gozan do ciclismo en boa compañía. A nosa identidade baséase na unión, o respecto polo ritmo de cada quen e o disfrute do camiño, sexa nun adestramento, nunha marcha cicloturista ou simplemente nunha saída de domingo.
Aínda que o noso terreo natural é a estrada, tamén nos atrevemos con outras disciplinas como o gravel, sempre coa mente aberta a novas experiencias e eventos co obxectivo de descubrir lugares, compartir retos e facer amizades.
No Clube Ciclista Cidade de Lugo non importa o nivel, senón as ganas de pedalear, rir e formar parte dun grupo que avanza unido. Se buscas un lugar onde sentirte parte dun equipo, superarte con apoio, e gozar do ciclismo sen presións, xa tes sitio connosco.
Agora xa sabes quen somos, pero… se queres saber máis, contacta connosco.